ଭୁବନେଶ୍ୱର,୨୪।୮ (ଭୟେସ ଅଫ୍ ଇଣ୍ଡିଆ/ବିନୟ କୁମାର ଦାସ) :-, ଭାଜପା ରାଜ୍ୟ ସଭା ପ୍ରାର୍ଥୀଙ୍କୁ ନେଇ ଲାଗି ରହିଥିବା ଦ୍ବନ୍ଦ୍ବରେ ପଡିଛି ପୂର୍ଣ୍ଣଚ୍ଛେଦ । ନିଜେ ସ୍ପଷ୍ଟ କରିଛନ୍ତି ରାଜ୍ୟ ଭାଜପା ସଭାପତି ମନମୋହନ ସାମଲ । ଓଡ଼ିଶାରେ ଖାଲି ପଡିଥିବା ଗୋଟିଏ ରାଜ୍ୟସଭା ସିଟ ପାଇଁ ଭାଜପାରୁ ୨ ଜଣ ପ୍ରାର୍ଥୀ ନାମାଙ୍କନ ଭରିଥିଲେ। ତେବେ ଏହି ୨ଜଣଙ୍କ ଭିତରେ କିଏ ରାଜ୍ୟ ସଭା ଯିବେ ସେ ନେଇ ଚର୍ଚ୍ଚା ଲାଗି ରହିଥିଲା। ମମତା ମହାନ୍ତ ଭାଜପା ପ୍ରାର୍ଥୀ ଭାବେ ନାମାଙ୍କନ ଦାଖଲ କରିଥିବାବେଳେ ଭାଜପାର ଜଗନ୍ନାଥ ପ୍ରଧାନ ସ୍ବାଧୀନ ପ୍ରାର୍ଥୀ ଭାବେ ନାମାଙ୍କନ ଦାଖଲ କରିଥିଲେ। ସବୁଠାରୁ ବଡ଼ କଥା ହେଉଛି ୨ଜଣଙ୍କ ପ୍ରାର୍ଥୀପତ୍ର କାଏମ ମଧ୍ୟ ହୋଇଯାଇଥିଲା। ୨ଜଣଙ୍କ ଭିତରୁ ରାଜ୍ୟ ସଭା କାହାକୁ ପଠାଇବ ଭାଜପା ଏହାକୁ ନେଇ ଶେଷରେ ମୁହଁ ଖୋଲିଛନ୍ତି ରାଜ୍ୟ ଭାଜପା ସଭାପତି ମନମୋହନ ସାମଲ ।
ମନମୋହନ କହିଛନ୍ତି, ରାଜ୍ୟ ସଭା ପାଇଁ ଆମର ଦଳୀୟ ପ୍ରାର୍ଥୀ ହେଉଛନ୍ତି ମମତା ମହାନ୍ତ । ତାଙ୍କୁ ହିଁ ଭାଜପା ପ୍ରାର୍ଥୀ କରିଛି । ଆଉ ଯାହାକୁ ଦଳ ପ୍ରାର୍ଥୀ କରିଛି ସେ ହିଁ ଫାଇନାଲ । ତେବେ ଅନ୍ୟ ଜଣେ ଭାଜପା ନେତା ଜଗନ୍ନାଥ ପ୍ରଧାନ ସ୍ବାଧୀନ ଭାବେ ପ୍ରାର୍ଥୀପତ୍ର ଦାଖଲ କରିବାକୁ ନେଇ ମଧ୍ୟ ବଡ଼ ବୟାନ ଦେଇଛନ୍ତି ମନମୋହନ । ସେ କହିଛନ୍ତି, ଡମି ପ୍ରାର୍ଥୀ ଭାବେ ଜଗନ୍ନାଥ ପ୍ରଧାନ ନାମାଙ୍କନ କରିଛନ୍ତି । ଦଳୀୟ ଚିହ୍ନରେ ଯିଏ ଲଢୁଛନ୍ତି ସେ ହିଁ ଦଳର ପ୍ରାର୍ଥୀ । ଆମର ପ୍ରାର୍ଥୀ ମମତା ମହାନ୍ତ । ପାର୍ଟି କାହାକୁ ଲଢେଇବ, ଡମି ପ୍ରାର୍ଥୀ ଦେବ, ସେଥିରେ କାହିଁକି ଅନ୍ୟମାନଙ୍କ ମୁଣ୍ଡବ୍ୟଥା ହେଉଛି ବୋଲି ସେ କହିଛନ୍ତି।
ସେପଟେ ସୁଭଦ୍ରା ଯୋଜନାକୁ ନେଇବିରୋଧୀଙ୍କ ଆରୋପ ଉପରେ ମଧ୍ୟ ପ୍ରତିକ୍ରିୟା ରଖିଛନ୍ତି ରାଜ୍ୟ ବିଜେପି ସଭାପତି ମନମୋହନ ସାମଲ । ସେ କହିଛନ୍ତି,‘ବିରୋଧୀ କିଛି ଦେଉ ନଥିଲେ ଆମେତ ଦେଉଛୁ । ସେମାନେ ଯଦି ଦେଇଥାନ୍ତେ ତେବେ ସେମାନଙ୍କର କହିବାର ଅଧିକାର ରହିଥାନ୍ତା । ମହିଳା ମାନଙ୍କୁ ସେମାନେ କେବଳ ଭୋଟ ବ୍ୟାଙ୍କ କରୁଥିଲେ । କେନ୍ଦ୍ରରୁ ମହିଳାଙ୍କ ପାଇଁ ଆସୁଥିବା ଟଙ୍କା ଆତ୍ମସାତ କରୁଥିଲେ । ଏବେ ମହିଳା ମାନଙ୍କୁ ଆତ୍ମର୍ନିଭର କରିବା ରାଜ୍ୟ ସରକାର ପଦକ୍ଷେପ ନେଉଛନ୍ତି । ବିରୋଧୀ ମାନଙ୍କର କହିବାର ଅଧିକାର ନାହିଁ କାରଣ ସେମାନେ ଦେଉନଥିଲେ।
