ଭୟେସ ଅଫ୍ ଇଣ୍ଡିଆ ଡିଜିଟାଲ ଡେସ୍କ: ପଶ୍ଚିମବଙ୍ଗ ବିଧାନସଭାରେ ମଙ୍ଗଳବାର ଦୁଷ୍କର୍ମ ନିରୋଧୀ ବିଲ୍ ଗୃହୀତ ହୋଇଛି। ‘ଅପରାଜିତା ମହିଳା ଓ ଶିଶୁ ବିଧେୟକ’ ନାମରେ ନାମିତ ଏହି ବିଧେୟକରେ ଦୁଷ୍କର୍ମକାରୀଙ୍କୁ ମୃତ୍ୟୁ ଦଣ୍ଡ ଦେବାର ବ୍ୟବସ୍ଥା ହୋଇଛି। ବିଧାନସଭାର ଏକ ସ୍ଵତନ୍ତ୍ର ଅଧିବେଶନ ଜରିଆରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସରକାର ଏହି ବିଲ୍କୁ ପାରିତ କରିଛନ୍ତି। କଲକାତା ଦୁଷ୍କର୍ମ ଓ ହତ୍ୟା ମାମଲା ପରେ ଦୋଷୀଙ୍କୁ କଠୋର ଦଣ୍ଡ ଦେବା ସହିତ ପୀଡ଼ିତାଙ୍କୁ ନ୍ୟାୟ ପ୍ରଦାନ ଲାଗି ସରକାର ଏହି ବିଲ୍ ଆଣିଥିବା କହିଛନ୍ତି। ଏହି ବିଧେୟକ ଜରିଆରେ ଏକ ଅପରାଜିତା ଟାସ୍କଫୋର୍ସ ଗଠନ କରାଯିବ ଏବଂ ମାମଲାର ପ୍ରାଥମିକ ରିପୋର୍ଟ ଦାଖଲ ହେବାର ୨୧ ଦିନ ଭିତରେ ଦୋଷୀଙ୍କୁ ଦଣ୍ଡ ଦିଆଯିବ ବୋଲି ମମତା କହିଛନ୍ତି।
ବିଲ୍ ଉପରେ ଆଲୋଚନା ସମୟରେ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି, ଦୁଷ୍କର୍ମ ଏବଂ ମହିଳାଙ୍କୁ ଯୌନ ଉତ୍ପୀଡ଼ନ ମାମଲାରେ ଦୋଷୀମାନଙ୍କୁ କଠୋର ଦଣ୍ଡ ଦେବା ବିଲ୍ର ଉଦ୍ଦେଶ୍ୟ। ପୋକ୍ସୋ ଆଇନରେ ରହିଥିବା ବ୍ୟବସ୍ଥାକୁ ଅଧିକ କଠୋର କରାଯାଇଛି।
ବିଧେୟକରେ କ’ଣ ରହିଛି ?
୧- ମହିଳାଙ୍କୁ ଉତ୍ପୀଡ଼ନ ଏବଂ ଦୁଷ୍କର୍ମ ମାମଲାରେ କଠୋର ଦଣ୍ଡ ଦିଆଯିବ
୨- ପୋକ୍ସୋ ଅଧିନୟମର ପ୍ରାବଧାନଗୁଡ଼ିକୁ ଅଧିକ କଠୋର କରାଯାଇଛି୩- ଦୁଷ୍କର୍ମ ପୀଡ଼ିତାଙ୍କ ମୃତ୍ୟୁ ଘଟିଲେ କିମ୍ବା ମସ୍ତିଷ୍କରେ ଗଭୀର କ୍ଷତି ହେଲେ ଦୋଷୀଙ୍କୁ ମୃତ୍ୟୁ ଦଣ୍ଡ ଦିଆଯିବ
୪- ବିଧେୟକ ଅଧୀନରେ ଅପରାଜିତା ଟାସ୍କ ଫୋର୍ସ ଗଠନ କରାଯିବ। ପ୍ରାଥମିକ ରିପୋର୍ଟର ୨୧ ଦିନ ମଧ୍ୟରେ ଦଣ୍ଡ ଦିଆଯିବ।
୫- ୧୨୦ କୋଟି ଟଙ୍କାର ଅର୍ଥ ମଞ୍ଜୁର କରିଛନ୍ତି ରାଜ୍ୟ ସରକାର
୬- ସବୁ ଜାଗାରେ ସିସିଟିଭି କ୍ୟାମେରା ଲଗାଯିବ
୭- ରାତ୍ରି ସାଥୀର ପ୍ରାବଧାନ ରହିଛି, ଯାହା ଅଧୀନରେ ମହିଳାମାନେ ୧୨ ଘଣ୍ଟା ଡ୍ୟୁଟି କରିବେ ଏବଂ ଆବଶ୍ୟକ ପଡ଼ିଲେ ଡାକ୍ତର ନିଜର ଡ୍ୟୁଟି ବଢ଼ାଇବେ।
୮- ରାତିରେ କାମ କରୁଥିବା ମହିଳାମାନଙ୍କୁ ସମ୍ପୂର୍ଣ୍ଣ ସୁରକ୍ଷା ଦିଆଯିବ
