January 27, 2025

ଭୁବନେଶ୍ୱର,୨୯।୧୧(ଭୟେସ ଅଫ୍ ଇଣ୍ଡିଆ/ବିନୟ କୁମାର ଦାସ) :–ନ୍ୟାୟପାଳିକାରେ ସମଗ୍ର ଦେଶରେ ୫ ହଜାର ୬୦୦ରୁ ଅଧିକ ବିଚାରପତି ପଦବୀ ଖାଲି ପଡ଼ିଛି ବୋଲି ସରକାର ସୂଚନା ଦେଇଛନ୍ତି। ଆଜି ଲୋକସଭାରେ ଏକ ଲିଖିତ ଉତ୍ତରରେ ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲ କହିଛନ୍ତି, ସୁପ୍ରିମକୋର୍ଟରେ ୨ଟି, ହାଇକୋର୍ଟ ଗୁଡିକରେ ୩୬୪ଟି ଏବଂ ଜିଲ୍ଲା ଓ ଅଧିନସ୍ତ ଅଦାଲତରେ ୫ ହଜାରରୁ ଅଧିକ ପଦବୀ ଖାଲି ପଡ଼ିଛି। ଆହ୍ଲାବାଦ ହାଇକୋର୍ଟରେ ୧୬୦ଟି ମଞ୍ଜୁରୀପ୍ରାପ୍ତ ବିଚାରପତି ପଦବୀ ଥିବା ବେଳେ ସେଥିମଧ୍ୟରୁ ପ୍ରାୟ ଅଧା, ୭୯ଟି ବିଚାରପତି ପଦବୀ ଖାଲି ପଡିଛି। ସେ ଆହୁରି ମଧ୍ୟ କହିଛନ୍ତି ଯେ ଗତ ପାଞ୍ଚ ବର୍ଷ ମଧ୍ୟରେ ଦେଶର ବିଭିନ୍ନ ହାଇକୋର୍ଟରେ ପାଖାପାଖି ୫୦୦ ବିଚାରପତି ନିଯୁକ୍ତ ହୋଇଛନ୍ତି।ଆଇନ ମନ୍ତ୍ରୀ କହିଛନ୍ତି ଯେ, ବର୍ତ୍ତମାନ ଖାଲି ପଡ଼ିଥିବା ପଦବୀଗୁଡ଼ିକୁ ଶୀଘ୍ର ପୂରଣ କରିବା ପାଇଁ ଯଥାସମ୍ଭବ ପ୍ରୟାସ କରାଯାଉଛି। ଅବସର, ଇସ୍ତଫା କିମ୍ବା ବିଚାରପତିଙ୍କ ପଦୋନ୍ନତି କାରଣରୁ ହାଇକୋର୍ଟରେ ବିଚାରପତି ପଦବୀ ଖାଲି ରହୁଛି। ସାମ୍ବିଧାନିକ ଅଦାଲତର ବିଚାରପତି ନିଯୁକ୍ତି କାର୍ଯ୍ୟନିର୍ବାହୀ ଏବଂ ନ୍ୟାୟପାଳିକା ମଧ୍ୟରେ ଏକ ନିରନ୍ତର, ସମନ୍ୱିତ ଏବଂ ସହଯୋଗୀ ପ୍ରକ୍ରିୟା ବୋଲି ସେ କହିଛନ୍ତି। ଏଥିପାଇଁ ଉଭୟ ରାଜ୍ୟ ଓ କେନ୍ଦ୍ରସ୍ତରରେ ବିଭିନ୍ନ ସାମ୍ବିଧାନିକ କର୍ତ୍ତୃପକ୍ଷଙ୍କ ପରାମର୍ଶ ଓ ଅନୁମୋଦନ ଆବଶ୍ୟକ।

ଅନ୍ୟ ଏକ ପ୍ରଶ୍ନର ଉତ୍ତରରେ ଶ୍ରୀ ମେଘଓ୍ଵାଲ କହିଛନ୍ତି, ୫ ବର୍ଷରୁ ଅଧିକ ସମୟ ଧରି ସୁପ୍ରିମକୋର୍ଟରେ ୧୯ ହଜାର ୫୦୦ରୁ ଅଧିକ ମାମଲା ବିଚାରାଧୀନ ରହିଛି। ବିଭିନ୍ନ ହାଇକୋର୍ଟରେ ୨୭ ଲକ୍ଷରୁ ଅଧିକ ମାମଲା ୫ ବର୍ଷରୁ ଅଧିକ ସମୟ ଧରି ବିଚାରାଧୀନ ରହିଛି।

Leave a Reply

Your email address will not be published. Required fields are marked *